Am Frytig, 2. Mai sy d Seeländer Trachtelüt ds Diessbach zäme gströmt für fröhlech mitenang z singe u z tanze. Üsi Tanzleiterinne Isabelle Kobel u Doris Marti zäme mit em Singleiter Herbert Sahli hei allem Aschyn a dr Nagel im Programmangebot uf e Chopf troffe, isch doch der ganz Abe unermüedlech tanzet u gsunge worde u d Musig „Trumpf-Puur“ het chuum einisch chönne verschnuufe. Üse Obma Markus Marti het d Fröid gha, die ygladne Gescht Marianne Ramseier, Obfrau vom Landesteil Oberaargau u d Trachtegruppe Ochlenberg i üsne Reihe z begrüesse u willkomme z heisse. D Ochleberger-Trachtelüt hei nis mit schöne u gnau usgfielete Lieder u Tänz überrascht u begeischteret u zletscht hei mer sogar nid nume alli mitenang tanzet, sondern o zäme gliedet. Würklech e schöne u glungene Abe für Oug, Ohr u Gmüet, wo o ds zäme gsprächle nid z churz cho isch! Härzleche Dank de Trachtegruppene Diessbach u Scheunenberg, wo sech für d Organisation zäme to u nis der ganz Abe mit guetem Ässe, Durschtlöscher u feine Turte u Gaffee verwöhnt hei.

Wes nech, wi mir, i Härz u Seel wohl to het u nech nach settigne Aläss gluschtet, de säget’s wyter u chömet ds nächscht mal mit no meh fröhleche Glychgsinnte cho yne luege. So fägt’s eifach!

Eine wo’s gnosse het, derby z sy
Kurt Hadorn