Dr letscht Sunntig im Oktober isch nid nume dr Termin für d Uhre uf Winterzit umzstelle- sondern o für d Mittuländer dr Wäg nach Gümlige azträte. Ir Mooshaue z Gümlige träffe sech Tanzleiterinne u Tanzleiter vo de Mittuländer Gruppe zum Tanzsunntig.
D Erika u dr Hans zeige üs e hufe nöii Tänz. Zersch geits im Polkaschritt über d Bsetzisteine vo Murte. Dr Site hinger Site vor Hüpfer im dritte Teili isch no chly gwöhnigsbedürftig.
Anschliessend wird gwalzeret. Dr Mareiwalzer, d Manuela Hofer spilt jedes Cherli so mängisch bis d Schritte sitze.
Nach dr Pouse gits e drüer Tanz, dr Frutiger Jubiläumswalzer. Es git drei Kreise a 5-6 drüer Grüppeli. Bi däm Tanz git scho d Ufstellig viel z erkläre.
Nach eme feine Mittagässe geits mit Hopp dä Bäse witer. D Manuela het ono chli Ungerstützig übercho u muess nüm ganz alleini ir Mitti vom Kreis musige.
I bi mir nid ganz sicher warum mir hür nume 50 Persone si- hei äch di Tanzleiter Angscht si chönnte dermit konfrontiert wärde das mir ja im Landesteil no es Vizetanzleiterpaar sueche?
Witer geits mit em Ämmitaler Hochzytstanz- e neckischi Polka wo näb de vile ghüpfte Schritte o ganz e ruehige Teil het. Was sech übrigens lohnt us z nütze u chli z verschnufe, es wird när grad ume schnäll. Bir letschte Wiederholig isch dr Kreis scho chli gschrumpft- so viu ghüpft isch nid für jedes.
Nach dr Ämmitaler Hochzit geits im Foxtakt dür ds Räbloch. Dert isch es äng u me cha mau hie ache luege oder da. Zu dere schöne Musig tanze üser Tanzleiter nach eme grosse Programm u dr ufkommende Müedikeit no voll Konzentration.
Bravo Tanzleiterinne u Tanzleiter, bravo Musig, bravo Erika u Hans!
Jetz blibt mir nume no z hoffe im nächschte Jahr, am letschte Oktobersunntig, wieder meh Tänzerinne u Tänzer hie z Gümlige dörfe willkomme z heisse!
 
Bild und Text Anna Burren