Bi schönschtem Früehligswätter fahre mier gägem Appebärg. Mier si gschpannt, was üs dert erwartet. I wott ke Schmuck mache, sägeni zur Ruth. I mäche oppe zwe bis drei Schlüsselahenger u när tueni lisme. I ha scho ir Schuel nid gärn baschtlet u kreativ bini ja o überhuupt nid. Wül mer chli z'früej si gsi, si mer no i d'Gartewirtschaft, wo mier scho die erschte Froui hii atroffe. Ä leider nume chlini Gruppe vo Froui si när im Bärbachsaal vo üser Kursliitere Rahel, vor Marlis Mosimann vom Appebärg, vom Vreni Kämpfer u vom Vreni Agostini härzlech begrüesst worde.

U scho isch es los gange. D'Rahel het üs verschiedeni Technike vom Mira Jolie erklärt. Di ganz dezidierte hii afa chnette u chügele. Anderi hii z'ersch chli müesse luege, was me alls chönnti mache. Ds Hanni isch zum Vreni Agostini, wo ds Handarbiite gliitet het, ga lisme.

Mier hii ja no üser Tischchärtleni müesse mache. D'Rahel het mit üs e Schüsselahenger mit eme Huuri gmacht. Da hets o ummi z'studiere ge. Wott me üni oder marmoriert? U dä cheibe Schnabel isch o nid grad z'erschte Mal graate. Jedefalls het du bis am Schluss jedes sis Tischchärtli gha. D'Zyt isch glechig verbi u scho hat's ghiisse, mier sötte ga Znacht ässe. Wär jitz miint, mier hiigi när firabe gmacht, het sech trumpiert. Nam Znacht simer ummi ga witerwärche u hii kügelet u kügelet .....

Am Donschtig isch fliissig witergmacht worde. D'Ruth isch hüt Beckermiischteri gsi u het gwüss bös gha. Allpott het das Öfeli glütet u de het si ummi müesse Waar tuusche. Di erschte Chötteni si fasch fertig gsi. Jitz mues me nume no wüsse, i weler Reihefolg dass me di Chügeleni wott ufzieh u was derzwüsche chunnt. D'Rahel het so e grossi Uswahl Sache bi sech gha, dass es gwüss nid so ifach isch gsi sech z'entscheide.

Di Froui hi die Chugli schön ufem Tisch der Reihe na usgliit, der passend Silberring, - Würfel oder Chugle - derzwüsche. Mou, so gfallts iim. När isch es a ds Ufzieh vo der ganze Pracht gange. Jitz no vor e Schpiegel ga luege, ob das öppis isch. Ja, schön, mou, das isch doch super. Nii, was isch de das? Da isch doch jitz ä falschi Chugle am falsche Ort! U warum isch de uf der Site nume iis Silberringli u nid zwü? U scho isch di ganzi Herrlechkiit ummi abgfädlet worde u nöi härebüschelet. D'Lismerfroui si a ds Feschter grückt, für chli me Liecht z'ha. Vor allem für ds Fichu z'lisme. Das Arme isch ja jitz scho sit drü Jahr agfange u darf geng nume ufem Appebärg us der Lismertäsche cho.

Am Fritig si vier Froui für e Tageskurs cho. Das hiisst für d'Rahel ummi vo vore afa mit erkläre. Aber am Abe hii alli wunderschöni Chötteleni chönne hiimneh. O mier hii fliissig gwärchet. Jitz wott i nümme mache, het's mengisch tönt. U wem e sche het verseh, hi si scho ummi öppis nöis agfange. D'Rahel het ja am Afang gsiit: Achtung! Äs macht süchtig! Ds Hanni, wo "nume" het welle lisme, isch du glich o no gwunderig worde u het so ne Plempu gmacht!

U när die Story mit dem dopplete Aschlag. Het doch iis das welle lehre. Ds Vreni het gsiit, das machi äs ging ä so, das hiigi äs scho so glehrt. Also het's ä Kurs ge: Unneueche, obenache, Fade riiche, unneusi furt! Also vom guelose isch da jitz niemer schlau worde, o we sis öppe tuusigmal hii wiederholt. Aber äs isch wahrschinlech no luschtig gsi. Usem Lismeregge het me's imu ghört gugele. Am Namittag isch das drüjehrige Fichu zur grosse Früüd vor Lismere fertig gsi u stolz präsentiert worde. Mier hii o am Abe nach em Znacht no a üsne Arbiite gwärchet. Das isch aber ganz freiwillig gsi. Am Fritig am Abe het üs ds Käthi derzue no ä Gschicht vorgläse.

Am Samschtig isch es du a ds Fertigmache gane. Wär nümme het z'tüe gha, het glismet oder ifach chli dorfet. Di letschte Sache si no fertiggschtellt worde. Ds Vreni Kämpfer het agfange, üüser Sache zu re chline Usschtellig z'büschele.

Mier hii no gar nüd vor Ässerei verzellt. Natürli si mier wie ging sehr verwöhnt worde us der Appebärg-Chuchi. Äs isch halt schön mal nume häre z'hocke u z'gniesse u nid müesse studiere, was me de morn welli choche. Ä grosse Dank der Marlis, der Chuchimannschaft u em fründleche Servicepersonal u alle andere guete Giischtleni.

Vor em Mittag het ds Vreni Kämpfer no ds Wort ergriffe u üsne Kursliiterinne danket. Für ds Vreni isch es z'letschte Mal gsi, won äs het ds Handarbiite gliitet. Es het vo üüs allne äs chlises Gschenkli als Erinnerig a Appebärg übercho. Mier alli hoffe natürli, dass äs glich aube no chunnt als Tiilnehmere. U wär wiis, vilech mues es de halt glich no mal dä verflixt dopplet Aschlag ziige. Ä grosse Dank är Rahel, wo alls organisiert het u Chischti vo Sache het häregschleppet, u natürli für die kompetenti Kursliitig.

Mier hoffe, dass äs anders Jahr chli meh Tiilnehmerinne mitmache. Chömet doch ä mal cho luege, wie mier das uf em Appebarg z'friede hii. Iehr chönnt ja o für ds erschte der Tageskurs cho bsueche.

A propos "zwe bis drei Schlüsselahengere mache". Am Schluss si's du zwölf gsi! Aber äbe, äs macht süchtig!

Text: Ruth Burkhard / Madlen Jutzeler
Fotos: Marlis Mosimann / Vreni Kämpfer