BILDER UND BERICHTE TRACHTENGRUPPEN

Ds Tüpfli ufem i - oder: Ungerhautigsabe bir TG Meikirch

November 2019


Jedes Jahr im November darf üsi Trachtegruppe Meikirch a dreine Äbe ir Aula im Schuelhuus Gassacker ihrem treue Publikum zeige, was sie bim Tanze, Singe u Theater igüebt u glehrt hei. O hüür hei mir am zwöite Novämberwucheänd mit viu Freud u Elan neu glehrti Tänz u Lieder chönne vorstelle.

 

Für üsi Ching ir Chindertanzgruppe, aber o für üsi Erwachsene, isch dr Ungerhautigsabe ging öppis ganz Bsundrigs u so zsäge, ds Tüpfli ufem i vom Vereinsjahr. I viune Tanz- u Singprobe üebe mir alli ifrig uf dä Momänt häre. Da isch natürlich klar, dass üsi Leiter gnau müesse häre luege u lose u de äbe das i-Tüpfli mit Gschick u Geduld a richtig Ort härerücke. Dass das ke verbissnigi, ärnsti Sach muess si, das dörfe mir i jedere Prob erläbe. So wird bim Joshua Hiltbrunner viu glacht u experimäntiert. Näbe traditionelle Volkslieder darf drum de o ä Schnabuwetzer wie ds «Sandwich» vom Mani Matter oder äs afrikanisches Lied mit viu Bewegig u Rhythmus Platz i üsem Programm finde. Bim Tanze, Hüpfe u Y- u Uslyere unger dr Leitig vor Doris Messer u dr Dora Bähler gits immer wieder viu ds Schmunzle. Öppe we me usefingt, dass me da ja Wösch uf hänkt, Fänster uf u zuetuet, Schlöflet oder zum Flugzügmarsch «De Erscht» erscht im zwöite Tanzblock wirblet.

 

Eis vo de ganz grosse i-Tüpfli het üsi Chindertanzgruppe gsetzt. I viune Tanzstunde hei sie mit dr Dora Bähler u dr Susanne Bigler dr Appizäller Aliwander glehrt u üs allne zeigt, wie me mit vereinte Chräft vo Gross u Chli zäme ä starchi Einheit biudet u so locker cha Ritigampfe. Bravo!

 

Was passiert, we me imene riese Gstürm u Chrusi-musi nid a alles dänkt, das het üs üsi Theatergruppe unger dr Regie vom Anton Zingg vor Ouge gfüehrt. Da geit äbe de dr Schutz hinger use, we das i-Tüpfli nid präzis uf ds Strichli gsetzt wird, die einti oder angeri Rächnig nid für jede glich guet uf geit u me de am Änd gwüss bau muess zuegäh, dass mir aube eis chli Lööle si…

 

Dir gseht, das zäme uf öppis häre schaffe, zäme chönne Lache, o we dasYlyre-Teili zum x-te Mal nid ufgah wott, zäme mit üsem Publikum die Äbe dörfe ds gniesse, zäme am Schluss als Gruppe wieder ufzruume u schliesslich de o wieder gmeinsam die nächste Projekt a ds gah – das alles verbindet üs u macht üsi Trachtegruppe us.

Das isch üses Tüpfli ufem i!

 

Text und Fotos: Romarie Münger